Арқаның аспанында жырдан жақұт жауған күн

Қазақтың қапыда кеткен арысы Мағжан Жұмабаевтың 120 жылдығына арналған мүшәйра Арқаның аспанында жырдан жауһар жауғызып, дарқан даланың төсін жас перілер тағы бір дүбірлетті. Мүшәйра Алаштың ардақтысы Мағжанның «Мен жастарға сенемін!» деген дуалы сөзін айдар етіп алыпты. Кілең жақсы жиналған мүшәйрада жас ақындардың кәусар жырына көпшілік шөлдеп бас қойды...
Бұл мүшәйраның өтуіне Қарағанды облысының жастар саясаты мәселелері жөніндегі басқармасы мұрындық болса, қолдау көрсеткен – Қазақстан Республи­касы Президентінің жанындағы жастар сая­саты жөніндегі кеңес. Сондай-ақ «Тіл және Рух» жастар басылымы да бұл іске ұйыт­қы болыпты.
Жыр бәйгесіне бабы мен бағын сына­ған 40-тан астам ақын өлең-жырын ұсы­ныпты. Алайда ережеге сәйкес, оның ара­сы­нан үздік деп танылған 12 өлең ақтық бәйгеге жолдама алыпты. Дүйім елді жинаған дүбірлі мүшәйрада осы 12 ақын ел алдына шығып, жырдан шашу шашты.
Мүшәйраның мақсаты – ұлтымыздың ұлы ақыны, Алаш ардақтысы Мағжан Жұмабаевтың өміршең шығармашылығын насихаттап, ұлттық поэзия арқылы жастар­ды рухани байлыққа, отансүйгіштікке, адам­гершілікке, өршілдікке тәрбиелеу және жас ақындарды тауып, оларға қолдау көрсету, көркем әдебиет пен тіл мәдениетін жандандыру.
Сонымен, 12 ақынның ақтық сынында оза шауып, бас жүлдені Жәнібек Әлиман бауырымыз еншілесе, одан кейінгі екінші жүлде Қуаныш Медеубаевқа бұйырды, үшін­ші орынды Рауан Қабидолдин иелен­ді. Сондай-ақ Қарағандының «Болашақ» университеті ұйымдастырған бес арнаулы сыйлық бес ақынға табыс етілді. Бұл ар­нау­лы сыйлықтар – Алаш арыстары атын­дағы сыйлықтар. Әлихан Бөкейхан атын­дағы сыйлық Мирас Асанға, Міржақып Ду­лат­ов атындағы сыйлық Дидар Әлімбек­ов­ке, Жақып Ақбаев атындағы сыйлық Айзада Рахымжановаға, Әлімхан Ермеков атынд­ағы сыйлық Ерболат Қуатбекке, Ах­мет Байтұрсынов атындағы сыйлық Кәм­шат Хасеноваға тапсырылды. Тағы төрт ақынға ынталандыру сыйлығы берілді. Қысқасы, мүшәйрада талабы мұқалған ақын болған жоқ. Мүшәйра мәреге жетке­німен, Қарағанды аспанын кернер жыр мұнымен тәмам болмақ емес.
«Жастар! Алда жүрген, Алаш жолында аянбай қызмет қылған адал жүрек ағалардан үлгі-өнеге алыңдар. Елдіктен, ерліктен айырылып, екі жүз жылдай еңсесі түскен елді ойлаңдар. Күнді – түн, жақын­ды – жат, пайданы – зиян деп жүрген, то­лық саяси құқықтарын іздеп алуға ер же­тіп, есі кірген елді ойлаңдар!» – депті Мағ­жан ақын «Мен жастарға сенемін!» өлеңінің әлқиссасында. Қазақтың ғана емес, Тұран жерінен шыққан күллі түріктекті халықтардың мақтанышына айналған Мағжан ақынның бұл өсиеті көкірегі ояу әр қазақ баласының санасында жаңғырып тұрса керек.
Ал Смағұл Сәдуақасов: «Мағжан – қазақ жастары ой-санасының әміршісі», – депті. Бұл әманда солай болары даусыз.