Еліміздегі жалпы білім беретін мектептерде тәрбие жұмысын ұйымдастыруға жәрдемдесетін «Адал ұрпақ» еріктілер клубы құрылмақ. Бұл туралы Талдықорғанда өткен брифингте айтылды.
Себебі мектептердегі тәрбие жұмыстарын уақыт талабына сай жетілдіріп отырған жөн. Еріктілер клубының негізгі міндеті – сыбайлас жемқорлыққа қарсы мәдениетті қалыптастыру. Клуб жанында 3 секция жұмыс істейді. Мәселен, жемқорлыққа қарсы білім секциясы дәрістер, дөңгелек үстел және басқа да ағарту шараларын ұйымдастыруға қатысса, ақпарат пен шығармашылық секциясы бейнероликтер мен сурет байқауын өткізуге ұйытқы болмақ. Ал мәдени-бұқаралық іс-шаралар секциясы флеш-мобтар дайындап, қоғамдық ұйым өкілдерімен кездесулер өткізеді. Гүлсара Исағұлова, облыстық білім басқармасы басшысының орынбасары: - Білім мекемелерінің барлығына жоспар таратылды. Қазіргі таңда түсіндіру жұмыстары жүріп жатыр. Алдағы уақытта осы бағытта жұмысымыз жолға қойылады деп ойлаймын.