Дәрі өндіретін жеті зауыт салынады

Отандық дәрі-дәрмекті 100 пайыз тұтынатын күн алыс емес. 2014 жылға дейін елімізде әлемдік сапа стандарттарына негізделген жеті жаңа фармацевтикалық зауыт салынады. Бұл туралы Алматыда өткен баспасөз мәслихатында белгілі болды.

Жақында қабылданған фармацевтика өнеркәсібін дамытудың 2010-2014 жыл­дарға арналған мемлекеттік бағдарла­масында отандық кәсіпорындарға еліміз­дегі дәрі-дәрмек қажеттілігін өтеуді 50 пайызға жеткізу міндеті жүктелгені белгілі. Осыған орай, алдағы төрт жылда республикада дәрі-дәрмек пен медицина өнімдерін шығаратын жеті зауыт салу қолға алынды. Сол сияқты, бұрыннан жұмыс істеп келе жатқан өзге фарма­цев­тикалық кәсіпорындар GMP стандартына көшіріле бастады. «Бұл жұмыстарды жүзеге асыру үшін мемлекет қазынасынан 30 мил­лиард теңгеден астам қаражат бөлінді», – дейді «Қазақстанның Фарм­Мед­Индустриясы» қауым­дастығының президенті Серік Сұлтанов.
Серік СҰЛТАНОВ, «Қазақстанның ФармМедИндустриясы» қауымдастығының президенті:
– Қазіргі таңда Қазақстанда дәрі-дәрмек шығарумен айналысатын 70 зауыт бар, бірақ соның жетеуі ғана республиканың бүкіл өнімдерінің
90 пайызын өндіреді.Осыған орай, елімізде өндірілетін дәрі-дәрмек көлемін ұлғайту әрі бағдарламада көрсетілген тапсырмалар мен міндеттемелерді орындау үшін отандық фармацевтикалық компаниялар жұмысын дамытуға қомақты инвестициялар құйылды. Атап айтсам, ол қаржы шығарылатын өнімдерді халықаралық талаптарға сай сапамен қамтамасыз етуге, жаңа зауыттар салуға, заманауи өндіріс жабдықтарын сатып алуға және мамандардың біліктілігін арттыруға жұмсалады.