Бір күнде 700 гектар орман өртеніп кетті

Өткен жұмада Қарағанды­ның – 250, Солтүстік Қазақстан облысының 450 гектар орманды даласы өртеніп кетті. Зардап шеккендер жоқ.
ҚР Төтенше жағдайлар министрлігінің хабарлауынша, шілденің 20-сы күні Қара­ғанды және Солтүстік Қазақстан облыс­тарының 700 гектарға жуық орманды даласы өртеніп кеткен. Атап айтқанда, 20 шілде күні Қарағанды облысы Осакаров­ка ауданында 125 гектар дала мен 1,7 гектар орманды алқап отқа оран­ған. Төтенше жағдай күндізгі сағат 16.00 шамасында тіркелгенімен, өрттің таралуы 21 шілде күні сағат 01.20-да тоқтатылып, 01.45-те толық сөндірілген. Өртті сөндіруге 46 маман мен 10 техника жұмылдырылған. Зардап шеккендер жоқ. Сондай-ақ дала өрті осы облысқа қарасты Ұлытау ауда­нында да болды. «Өрттің таралуы 2012 жылдың 20 шілдесінде сағат 10.15 шамасында тоқтатылып, сағат 15.00-де толығымен сөндірілді», – деп хабарлайды Қарағанды облыстық төтенше жағдайлар департаментінің баспасөз қызметі. Тілсіз жауды ауыздықтау жұмыстарымен барлығы 62 өрт сөндіруші мен 15 техника айналысқан. Өрттің жалпы аумағы 100 гектарды құрады. Ал Солтүстік Қазақстан облысының Айыртау ауданында тіркелген тілсіз жау даланың 450 гектар аумағын шар­пыған. Өрт жұма күні сағат 15.00-де баста­лып, 18.30-да толығымен сөндіріл­ген. Өртті сөндіруге 33 маман мен 11 техника жұмылдырылды.