Мүмкіндігі шектеулі жандар мемлекет тарапынан тиісті деңгейде қолдау алмайды - Дәулет Мұқаев
Мәжіліс депутаты Дәулет Мұқаев мүмкіндігі шектеулі жандарды баспанамен қамту мәселесін көтерді.
"Қазақстанда тұратын 711 мыңнан астам мүмкіндігі шектеулі азаматтардың 420 мыңы – еңбекке қабілетті азаматтар. Бұдан бөлек 187,5 мыңы зейнет жасында болса, 104,3 мыңы – кәмелеттік жасқа дейінгі балалар. Оларға мемлекет тарапынан қажетті деңгейде қолдау көрсетілмей келеді. Ашығын айтқанда, жеке баспанасын аңсап жүрген мүмкіндігі шектеулі жандардың саны жетерлік", - деді ол Премьер-Министр Әлихан Смайыловқа жолдаған депутаттық сауалда.
Халық қалаулысының сөзінше, мемлекет тарапынан баспана алуға арналған арнайы бағдарламалар қабылданғанымен, іс жүзінде мүмкіндігі шектеулі жандар үшін қолжетімсіз болып отыр.
"Негізгі мәселе – мүмкіндігі шектеулі жандардың жұмыспен қамтылмауы, сәйкесінше екінші деңгейлі банкте төлем қабілеттілігін растай алмауы. Бұл мүмкіндігі шектеулі жандардың баспана ипотекасын рәсімдеуге қол байлау болып отыр. Мүмкіндігі шектеулі жандар мен мүмкіндігі шектеулі бала тәрбиелеуші отбасылардың жұмыс жасауға мүмкіндігі жоқ. Бірақ қол қусырып отырған ешкім де жоқ. Олардың басым бөлігі үйден болса да жұмыс істеп нәпәқасын тауып отыр. Еліміздегі әрбір бесінші мүмкіндігі шектеулі жан ресми түрде жұмыс істейді", - деп атап өтті мәжілісмен.
Бірақ көбі зейнетақы аударымдарын аудара алмайды, деп жалғастырды ол.
Осыған байланысты депутат бұл мәселенің шешу жолын ұсынды.
"Біріншіден, мүмкіндігі шектеулі жандар үшін мемлекеттік бағдарлама талаптарын қайта қарау қажет. Яғни, ипотека рәсімдеуде жеңілдетілген ұсынымдар енгізілуі керек. Екіншіден, екінші деңгейлі банктердің мүмкіндігі шектеулі азаматтарымызға тәуекелі жоғары топ ретінде қарамау мәселесіне ерекше назар аудару қажетт. Мүмкіндігі шектеулі жандарға шексіз мүмкіндіктер сыйлау – сіз бен біздің басты міндетіміз", - деп түйіндеді депутат.
