Оразаның денсаулыққа пайдасы зор

Рамазанда 30 күн ораза тұту – бес парыздың бірі. Ал оның медициналық жағынан денсаулыққа қандай әсері болмақ?
Таңат ДОСЖАН, Ақтау
Бұл сұрағыңызға медицина ғылы­мының магистрі, Инемен емдеу қоға­мы­ның мүшесі, аға дәрігер Мақсат Әбдіқадыр жауап береді: «365 күн бойы қалтқысыз тамақ ішу – ағзаға жүк, зиянды. Ол қан тамырларды қатайтады. «Ауру астан келеді» деген сөз бар. Шығыс медицинасында ашықтырып емдеу әдісі бар. Ашық­тыру арқылы иммунитеттік мүшелердің: ұйқы, көкірек асты бездерінің қызметін қалпына келтіруге болады. Ислам медицинасында ғылымилық бар. Көп ауру асқазан арқылы келеді. Тамақты тойып ішу­ге болмайды. Оразада­ғыдай күніне бір-екі рет 18 сағатқа дейін тамақ ішпеу ащы және тоқ ішектердегі тұрып қалған шлак­тарды сіңірілген­ше сіңіріп, сіңіріл­меге­нін сыртқа шығарады. Ауызашар уақы­тында ас ішкен соң асқазан арқылы ащы, тоқ ішектер әрекетке түсіп, қызметі жақ­сарады. Ораза — аллергия сипатты тері ауруларына; терінің майлану ауруларына; асқазанның созылуына; созылмалы асқазан ауруы, асқазан түгінің құруы, тоқ­ішектің қабынуы; демікпе, қант диабеті; жүрек, қан тамыр аурулары, жоға­ры қы­сым, семіздікке, іштің қатуы мен асқазан қорыт­пауына бірден-бір шипа».