Еңбек өтілі бойынша зейнетақы қалай тағайындалады?
Зейнетке шығар кезде зейнетақы мөлшері қандай мәліметтерге байланысты анықталады? Соңғы үш жылдағы зейнетақы төлемдеріне байланысты белгіленеді деген рас па?
Талғат АХМЕТОВ, Астана
Бұл сауалға Мемлекеттік зейнетақы төлеу орталығы мамандары жауап береді:
– 1998 жылдың 1 қаңтарына дейін 25 жыл еңбек өтілі болған ерлер 63 жасқа толғанда, 20 жыл стажы болған әйел адамдар 58 жасқа толғанда, Мемлекеттік зейнетақы төлеу орталығынан зейнетақы тағайындалады. Зейнетақы мөлшері ретінде орташа айлықтың 60 пайызы алынады. Орташа айлық 1995 жылдың 1 қаңтарынан бастап кез келген қатарынан үш жыл көрсеткіші бойынша анықталады. Зейнетке шығу үшін қажетті 20 немесе 25 жылдан артық еңбек өтілінің әр жылы үшін зейнетақы мөлшері 1 пайызға арттырылады. Бірақ зейнетақы төлемі айлық есептік көрсеткіштің (АЕК=1413 теңге) 32 еселенген мөлшерінің 75 пайызынан аспауы тиіс. Мысалы, 63 жасқа толған азаматтың үш жылдағы орташа айлығы – 55 мың теңге. Оған 33 912 теңге мөлшеріндегі максималды зейнетақы тағайындалады.
