Хикметшілер сынға түсті

Қожа Ахмет Ясауи кесенесінің негізінде құрылған «Әзірет Сұлтан» мемлекеттік тарихи-мәдени қорық-мұражайы Қожа Ахмет Ясауи мұраларын насихаттауға арналған бірнеше дәстүрлі іс-шараларды өткізіп келеді. Солардың ішінде мектеп оқушылары арасында жыл сайын ұйымдастырылатын «Ясауитану» республикалық байқауының шоқтығы биік. Себебі осы шара аясында Қазақстанның әр мектебінің 8-11-сынып оқушылары Ясауидің даналық жауһарларымен жақынырақ танысуға мүмкіндік алады. Хикметтерді жаттап, баба сырын жүректерімен ұғынуға талпынады.
Жуырда өткен сайыста еліміздің түкпір-түк­пірінен келген жас өрендер жарыс кө­рігін қыздырды. Қазақстанның он төрт об­лы­сы мен үш қаласынан бас қосқан жет­­кіншектер алғашқы күні Түркістанның та­рихи көрнекті жерлерін аралап, ше­жі­ресіне қанықты. Жалпы саны 80-ге жуық са­йыскер келесі күні өз бақтары мен бап­тарын сынға салды. Байқауға қорық-мұ­ра­жай басшысы Мәулен Садықбеков бас­таған қазылар төрелік етті. Әділқазылар ал­қасы Қожа Ахмет Ясауи хикметтерін кө­не түркіден қазіргі қазақ тіліне тәржі­ма­ла­ған ақын, «Дарын» сыйлығының иегері Свет­қали Нұржан, Қ.А.Ясауи атындағы ХҚТУ профессоры, ясауитанушы Досай Кен­жетай, тарихшы Зікірия Жан­дар­бек жә­не әдебиеттанушы Болат Қорғанбек сияқ­ты танымал ғалымдардан құралды.  Бұл ба­й­қаудың оқушылар арасында өтетін бас­қа байқауларға қарағанда көптеген ерек­шелігі болды. Үш кезеңнен тұратын са­йыстың бірінші кезеңінде шәкірттер хик­мет­терді жатқа айту бойынша бәсекеге түс­ті. Екінші кезең бойынша Қожа Ахмет Ясауи ілімі мен мұраларына қатысты, кесене мен ондағы жәдігерлерге қатысты, Әзірет Сұлтан өмірі жайлы аңыз-әпсаналар жөнінде сұрақтарға жауап беріп, білімдерін байқатты. Оқушылардың саналарына салмақ салған ең қиын сәт үшінші кезең болды. Бұл кезеңнің ережесі бойынша іріктеу сындарынан өткен сайыскерлер хик­меттер ішіндегі тірек сөздердің қанша рет кездесетіндігін дәл тауып, олар ұшырасатын шумақтарды мүдірмей айтып беруі тиіс еді.
Мәулен САДЫҚБЕКОВ, «Әзірет Сұлтан» мемлекеттік тарихи-мәдени қорық-мұражайының директоры:
– Біз бүгінгі таңда «Ясауитану» бай­қауын өткізу арқылы көптеген табысқа қол жеткізіп отырмыз. Байқаудың өрісі жылдан-жылға кеңейіп келеді. Қа­ты­суға талап білдіріп жатқандардың да қа­расы артып отыр. Бұл жайтты біздің же­ңісіміз деп бағалауға болады. Себебі Әзі­рет Сұлтан мұрасы – қазақ халқының аса қымбат қазынасы. Жас ұрпақтың хик­меттерді жаттап, оған қатысты сұ­рақ­тарға жаңылмай жауап беріп жатуы кім-кімді де болса сүйсіндірмей қой­масы анық. Барлық талапкерлер өмірде өз орнын табатын үлкен азаматтар бо­лады деп сенемін.
Топ жарып шыққандар қатарында Қызылорда облысы Қазалы ауданының түлегі Гүлсана Шарападин бас жүлдемен бірге қомақты ақшалай жүлде – 100 000 теңгеге ие болды. Бірінші орын мен 80 000 теңге Оңтүстік Қазақстан облысы Мақ­та­арал ауданынан келген Шәріп Оңғарбектің қанжығасында кетті. Екінші орынға Со­зақ­тық Төлеген Ергешбайтегі мен Астана қа­ла­сынан арнайы жеткен Аружан Жамбыл ла­йық деп табылды. Үшінші орын ал­ма­тылық Мейрамгүл Абдраманова және Түр­кістан шаһарының түлектері Севара Не­мет­жанова мен Гүлдана Ермекке бұйырды. Жүлдегерлердің барлығының да қаржылай қомақты сыйлықтар иеленгендігін айта кету қажет. Сонымен бірге үздік білім­де­рімен көрермендерді тәнті еткен он оқу­шыға ынталандыру сыйлықтары тап­сы­рылды. Қалған оқушылардың барлығы да ар­найы алғысхаттармен марапатталып, олар­ға да тартулар табыс етілді.