Өзге емес, өзіміз деп білеміз

«Менен ұлтымды сұраған кезде «әкем – орыс, анам – корей, ал өзім  – қазақпын!» деп жауап беремін және менің жеңістерім осы ел үшін!»  Бұл – бокстан әлем чемпионы Геннадий Головкиннің қазақ еліне деген құрметі, жүрекжарды сөзі.  XX ғасырдың басында жаппай қуғын-сүргін етек алған зұлмат жылдарда тағдырдың тәлкегімен елімізге келген талай ұлт бүгінде қазақ жерін өз елім деп таниды. Тіпті ұлттық құндылықтарымызды дәріптеп, қазақ тілін өз ана тіліндей көріп, ұлттық салт- дәстүрлерімізді ұстанып жүргендері де аз емес. «Бұл, ең алдымен, сонау жылдары талай ұлыстың ұрпағына пана болып қана қоймай, өз баласындай бауырына тарта білген қазақ халқының кең­пейіл мінезінің арқасы» дейді бүгінде түрі басқа болғанымен, тілегі бір ұлттар.
Өзекке теппей, өз бауырына тарта біл­гендіктен де шығар, бүгінде қазақ хал­қына қазақтың өзіндей жаны ашитын тұл­ға­ларымыздың қалыптасуы. Қазақ әде­биетінің дамуына елеулі үлес қосып жүрген Герольд Бельгер ағамыз, қазақ тілінің үс­темдігі үшін жанын беруге бар Асылы Ос­ман апамыз, қазақ туын ірі додаларда биік­­тен желбіретіп жүрген Геннадий Го­лов­кин, Ислам Байрамуковтай тұл­ға­ла­ры­мыз – осының дәлелі. Тіпті олардың шұ­рай­лы ана тілімізде еркін сөйлеп, қазақ мүд­десі үшін қызылкеңірдек болып пікір талас­ты­руы ел мерейі екені даусыз.
Отарлау саясатымен елімізге қоныс аударған орыс-татарларды айтпағанда, бертіндегі сталиндік кезең мен тың игеру жылдары келген шешен-ингуш, қарашай-балқар, корейлердің өздері елімізде ұрпақ ал­­масудың төрт-бес буынын өткерді. Хал­қы­мыз оларды жат санамай, бауырына тартты, олар құнарлы топыраққа түскен дәндей жайқала көктеді, тамырын тереңге салды. Осы үшін олардың да қазақ еліне де­ген алғысы шексіз. Жақында Қазақстан ко­­рейлері қауымдастығының баста­ма­сымен Орал өңірінен бой көтерген «Қазақ хал­қына мың алғыс!» монументі – осының дәлелі. Еліміздің өркендеуіне сөзімен ғана емес, ісімен де үлес қосып жүрген өзге ұлт өкілдері жетерлік. 
Наталья ТЕГАЙ, Корей мәдени орталығының жетекшісі:
– Қазақтың кеңпейілдігі болмаса, біз­дің болашағымыздың қалай қалып­та­суы белгісіз еді. Айналып келгенде, қазақ халқының өз баласындай бауы­ры­на тартуы біздің де Қазақстанға рия­сыз көңілімізбен сіңісуімізге әсер етті. Осы­нау қазақ жеріне, қазақ еліне қыз­мет ету баршамыздың міндетіміз бо­лары анық. Тағдырдың жазуымен ко­рей­­лердің қазақ жеріне де­­п­ор­­та­­ция­лан­­ғанына 75 жыл толды. Жұр­­­ты­­мыздың қазақ еліне сіңіскені сон­шалық, қа­зақтардың озық деген тұрмыс-салты біздің де күнделікті тұрмыс- салтымызға ай­налып барады. Мәселен, бүгінде Қызылорда өңіріндегі талай кәріс қазақ ті­лінде таза сөйлеп қана қоймай, құр­метті адамына жылқы етін тартып, қа­зақ­тың қымызы мен шұбатын дас­тар­қа­нына қоюды әдетке айналдырып отыр. Мұның барлығы – Қа­зақ­стандағы ұлттар ара­сындағы та­ту­лыққа үндейтін саясаттың дұ­рыс жолға қо­йылғанының арқасы.   
Ахмет АЛЯЗ, «Қазақстан-ZAMAN» халықаралық газетінің бас директоры:
– Өзге ұлт өкілдерінің арасында қазақ халқының ұлттық құндылықтарын ұлық­тап, тіпті күнделікті тұрмыс салтын­да қолданып жүрген өзге ұлт өкілдері же­терлік. Мәселен, менің туыста­рым­ның арасында балаларын қазақтың бе­сігіне жатқызып өсіріп жатқандары бар. Қазақ тілін ана тіліндей меңгер­ген­дері де жетерлік. Мұның барлығын олар қазақ халқын үлгі тұтып, өзіндей сезін­ген­діктен жасап отыр. Мен де қазір қазақтілді газетті басқарып отырмын. Газетім арқылы қазақтың мүддесін бірінші орынға қойып, қазақ мәселесін көтеріп жүрмін. Қазақстанда туып, қа­зақ жерін басып жүргеннен кейін, қа­зақ­тардың жақсылығын күнделікті кө­ріп жүргендіктен қазақ халқына деген алғысым ретінде осындай қадамға барып отырмын. Мен қазақтай кең­пейіл жұрттың алдындағы пары­зымды мұнымен өтей алмайтынымды да білемін.